Os enemigos do monte veciñal en man común, aproveitando que o Pladiga (Plan de prevención e de defensa contra os incendios forestais) do ano 2025 recolle que na última década houbo máis superficie queimada de monte veciñal que superficie queimada de montes de propiedade privada, están lanzando informacións manipuladoras. Como que os montes veciñais en man común teñen máis posibilidades de arder que os montes particulares. Estas consignas manipuladoras teñen como obxetivo o de crear argumentos falsos para xustificarse que na nova lei de montes veciñais, que está a preparar a Consellería do Medio Rural, se pretenda eliminar o carácter xermánico dos montes veciñais para poder proceder a súa municipalización ou a súa privatización. En ambos casos, para roubarllos á veciñanza comuneira .
Na xeración destas información tendenciosas contra os montes veciñais en man común tamén participa a Dirección Xeral de Defensa do monte, autor do Pladiga, cando insinua que a forma de titularidade, logo a forma de xestión dos montes, son os que provocan os lumes. Dende a ORGACCMM entendemos que estas manifestacións son impresentabeis, ademais de ser sacadas da manipulación dos datos.
A cuestión non se atopa nos datos das superficies queimadas por tipos de montes que aparecen no Pladiga 2025, que non dubidamos que sexan certos. A cuestión está en que se oculta o lugar onde se inician os lumes. Cuestión que se agrava porque estes datos existen, grazas a importante labor que levan os equipos de investigación da Consellería do Medio Rural e das forzas de seguridade sobre a orixe dos lumes. Deste xeito, poderíase comprobar que maioría do inicio dos lumes non se dan nos montes veciñais.
Non son nos montes veciñais onde se orixinan a maioira do lumes. Pola contra, os montes veciñais son as terras que sofren as consecuencias dos lumes cando estes adquiren grandes dimensións dende os seus lugares de inicio. Motivados principalmente por unha errada política de prevención da Conselleria do Medio Rural.
Dende a ORGACCMM esiximos a Dirección Xeral de Defensa do monte que faga públicos os lugares onde se iniciaron os lumes na última década, se non quere ser cómplice deste ataque contra os montes veciñais en man común.
