Mes: mayo 2022

• A Organización Galega de comunidades de montes fai un chamamento á participación na manifestación deste domingo 5 de xuño  que convoca a Cordenadora Eólicos Así Non ás 12 da mañán  en Compostela.
• Demandan capacidade de decisión para as comunidades de montes para aceptar o rexeitar os proxectos eólicos plantexados nos seus montes veciñais.

O expolio que as eléctricas están perpretando no terrritorio galego, amparadas pola falta de planificación e ordenación do sector eólico, afecta gravemente ás comunidades de montes. O monte veciñal vese exposto ao extractivismo e mercantilización.

O Plano sectorial  eólico actual  implica de facto unha expropiación directa e recualificación dos montes veciñais en man común. A lei de fomento de implantación de iniciativas empresariais e a lei de simplificación administrativa consideran de utilidade pública o negocio privado das empresas enerxéticas en contra dos montes veciñais en man común.

O monte veciñal, polas súas carácteristicas de titularidade xermánica, ten compoñentes de ben común, ben social  e utilidade pública.  Para a ORGACCMM é imprescindible a derogación de estas dúas leis como primeiro paso para preservar o monte comunal.

A Organización Galega de Comunidades de Montes subliña que a enerxía eólica ten que ser considerada como un recurso do país polo que no seu ordenamento deben primar os intereses do pobo galego e nos os beneficios do oligopólio eléctrico. A instalación de parques eólicos debe favorecer á veciñanza da contorna socializando os beneficios. Ademais no ámbito galego, o camiño da soberania enerxética debe ir aparellado dun abaratamento do prezo da enerxia para os fogares.

«Reclamamos á administración galega que aposte decididamente polo autoconsumo apoiando ás comunidades enerxéticas locais fronte os sistemas de produción de distribución oligopolista» sinala Xosé Pereira, presidente da Organización Galega de Comunidades de Montes.

Desde a Organización Galega de Comunidades de Montes insisten en que o desenvolvemento da enerxía eólica en Galiza ten que ir acompañado da eliminación paulatina da enerxía xerada por combustibles fósiles. Recalcan que é necesario un ordenamento do territorio con zonas de exclusión e límites á acumulación de parques eólicos nunha mesma zona. Demandan capacidade de decisión para as comunidades de montes para aceptar o rexeitar os proxectos eólicos plantexados nos seus montes veciñais.

«Como ben indica o lema da manifestación convocada pola Cordenadora  Eólicos Así  Non,  hai outra alternativa ao modelo actual de despliegue das renovables. Só é necesario ter vontade política para desenvolver unha transición enerxética xusta, ecoloxicamente sustentabel e para o pobo» resantan desde a ORGACCMM.

• Os pasados día  21 e 22 de maio, na casa de Cultura ”Daniel Castelao “ do concello de Moaña, tivo lugar o VII Congreso Galego de comunidades de montes, no que participaron máis de 100 comunidades de montes de todo o país.

A principal conclusión do VII Congreso Galego de comunidades de montes foi o rexeitamento unánime á pretensión da Consellería do Medio Rural  de privatizar os montes veciñais en man común  eliminando  o carácter xermánico da titularidade  veciñal para convertilos en titularidades privadas e dando entrada como veciños/as comuneiros/as, a empresas que queran explotar o monte veciñal.

A veciñanza comuneira aprobou unha resolución contra este intento de privatización dos montes veciñais, rexeitando así esta estratexia do capitalismo mundial de apropiarse da terra comunal para expoliar todos os recursos que nela se dan.

«Ante esta situación, para parar o roubo do monte veciñal que pretende a consellería do medio rural, faise fundamental a recollida de sinaturas para que se tramita no Parlamento Galego a nosa ILP. Necesitamos unha lei de montes ao servizo da veciñanza comuneira e da sociedade galega no seu conxunto» apunta Xose Pereira, reelexido presidente da ORGACCMM.

No decurso do VII Congreso tamén se rindeu unha homaxe a aquelas persoas que formaron parte das diversas xuntas reitoras da Organización Galega de Comunidades de Montes. A homaxe consistiu na proxeción dun audiovisual con imaxes que dende a celebración do 1º Congreso e a constitución da Orgaccmm, ata a celebración do día da loita da veciñanza comuneira e a recente elaboración dunha unidade didactica sobre o monte veciñal. Lembrando, entre mentres, as manifestación contra o imposto sobre sociedades, as mobilizacións contra as falsas e inxustas débedas dos convenios e dos consorcios. Ademais entregouselle un diploma ás persoas homenaxadas recoñocendo o seu traballo o seu eforzo. Destacando que sen elas a Orgaccmm non sería tan ampla e forte.

Os representaes da veciñanza comuneira galega amosaron o recoñocemento á Comunidade de Montes de Tameiga pola preservación do seu monte veciñal. Unha defensa do ben común ante os intereses especulativos do presidente de Real Clube Celta de Vigo e a alcaldesa do concello de Mos, que pretenden roubarlle a veciñanza de Tameiga o seu monte omunal.

O VII Congreso Galego de comunidades de montes rematou coa elección da séptima xunta reitora da Orgaccmm. Dentro dunha senda continuista, levouse adiante unha profunda e positiva renovación, tanto dos membros da xunta como da súa estructura territorial.

A Organización Galega de Comunidades de Montes xunto con representantes dos bombeiros/as forestais denuncian o desleixo da Consellería de Medio Rural coa aplicación e desenvolvemento das medidas preventivas contra o lume.

Subliñan que o desleixo é evidente ante a carencia de axudas específicas para prevención e defensa contra os lumes forestais. Ao contrario que en anos precedentes, a Consellería do Medio Rural non proporcionou unha liña especifica de prevención e defensa contra os lumes forestais, na que ademais de reducir a biomasa forestal, se sufragaba unha medida imprescindible como a instalación puntos de abastecemento de auga.

As organizacións denuncian que a única liña de axudas que sacou esta consellería neste ano foi para accións silvicolas como rozas, clareados ou plantacións. Apuntan que «isto pódese comprobar doadamente, só hai que revisar o Diario Oficial de Galicia».

Ao desleixo na aplicación de medidas preventivas únese a precariedade laboral dos bomebeiros forestais, quen levan tempo reclamando traballo continuo todo o ano e melloras nas súas precarias condicións laborais para acadar unha loita mais eficaz contra os lumes forestais.

Alertan que esta irresponsable relaxación da Consellería pode traer consecuencias catastróficas para os montes galegos e instan ao goberno galego a adoptar medidas inmediatas e corrixir a perigosa deriva.

Ademais o presidente da ORGACCMM reprochou ao conselleiro de Medio Rural  que este anunciara que a proposta de lei de montes veciñais era pública e accesible: «No portal  de transparencia da Xunta somentes hai unha declaración de intencións por parte do goberno galego. Non aparece ningunha lei co seu texto articulado».

• Os dias 21 e 22 de Maio, celelebrase o VII Congreso Galego de comunidades de montes baixo o lema “25 anos na defensa dos intereses da veciñanza comuneira”

O VII Congreso galego terá lugar na Casa de Cultura “Daniel Castelao” no concello de Moaña e dabatiranse dous relatorios: ”Na defensa do monte veciñal” e “Valoración xeral dos montes veciñais”.

Ademais dos representantes das comunidades de montes podrán  participar no Congreso organizacións e persoas relacionadas co monte veciñal e co medio rural que sexan convidadas.

Aquelas comunidades de montes, organizacións ou persoas individuais que queiran participar no VII Congreso Galego poden facelo comunicando a súa intención ao correo electrónico xapegonda@gmail.com antes do dia  14 de Maio de 2022 .